د اېران اسلامي جمهوریت د ښوونې او روزنې وزیر سره د افغانستان د پوهنې وزارت مرستیال،

د اېران اسلامي جمهوریت د ښوونې او روزنې وزیر سره د افغانستان د پوهنې وزارت مرستیال، ډاکټر سردار محمد رحیمي کتنهد ۱۴۰۰ لمریز کال د غبرګولي په ۲۵مه نېټه په تهران کې د افغانستان اسلامي جمهوریت لوی سفیر او ځانګړي استازي، څېړنوال عبدالغفور لېوال د افغانستان د پوهنې وزارت مرستیال، ښاغلي ډاکټر سردار محمد رحیمي په ملتیا د اېران اسلامي جمهوریت د ښوونې او روزنې وزیر، ښاغلي محسن حاجي میرزایي سره وکتل.په دغه کتنه کې ډاکټر رحیمي د بې اقامې افغان ماشومانو د نوم لیکنې په اړه د اېران اسلامي جمهوریت د رهبر دستور له امله مننه وکړه او دا کار یې د افغان کډوالو ماشومانو د ښوونې او روزنې په بهیر کې یو نوی فصل وګڼه. د پوهنې وزارت مرستیال هیله مندي څرګنده کړه چې د دغه وزارت د همکاریو په پایله کې د هغو کسانو د نوم لیکنې مسئله چې تحصیلي پاڼه یې نه ده تر لاسه کړې په ځانګړي ډول د لومړي ټولګيو جدیدالشمولو زده کوونکو او همدا راز د کډوالو ځانګړو ښوونځیو فعالیت جواز مسئله حل شوه. د اېران اسلامي جمهوریت د پوهنې وزیر، ښاغلي محسن حاجي میرزایي، زموږ د هېواد چارواکو ته د ښه راغلاست ویلو ترڅنګ په افغانستان کې د وروستیو پېښو له امله د شهید شویو زده کوونکو د شهادت له امله خواشیني وښوده. نوموړي وویل چې موږ د نوم لیکنې او روزنې په برخه کې محدودیت نه لرو او که چېرې ستونزه هم موجوده وي د نورو وزارتونو په مرسته به یې حل کړو. نوموړي ټینګار وکړ، چې د اېران اسلامي جمهوریت افغان زده کړیالانو لپاره هېڅ ډول هڅې نه دي سپمولي او پرته له توپیر څخه افغان ماشومان د اېراني زده کوونکو ترڅنګ زده کړې کوي. د اېران پوهنې وزیر د دواړو هېوادونو د پوهنې وزارتونو ترمنځ د یوه هوکړه لیک د وروستي کېدو او لاسلیک ډاډ ورکړ. په دې کتنه کې د پوهنې وزارت سلاکار، ښاغلي محبوب شاه فقیري او پوهنې اتشې، سید علي حسیني هم حضور درلود.